Serivisi yo Serivisi yo gukumira, kuvura no gukurikirana abafite Virusi itera SIDA
Serivisi yo gukumira, kuvura, kwita no gukurikirana abafite Virusi itera SIDA itangwa hifashishijwe Imiti igabanya Ubukana bwayo (ART), ni serivisi y’ubuvuzi ihabwa abantu babana na virusi itera SIDA, igamije kugabanya ubwinshi bw’iyo virusi mu mubiri, gukomeza ubudahangarwa bw’umubiri, gukumira indwara ziterwa na virusi itera SIDA no gufasha ababana nayo kubaho igihe kirekire kandi bafite ubuzima bwiza.
Ibitaro by’Akarere bya Kiziguro bitanga serivisi ya ART mu buryo buhoraho kandi bwita ku murwayi by'umwihariko, bukubiyemo kuvura virusi itera SIDA, gukurikirana uko umurwayi amerewe, kumugira inama, kumufasha gukurikiza amabwiriza yo gufata imiti no gutanga serivisi zo gukumira ubwandu.
Serivisi zitangwa muri ART zikubiyemo ibi bikurikira:
1. Gupima virusi itera SIDA no guhuza abayanduye na serivisi z’ubuvuzi: Gupima virusi itera SIDA, kwemeza ko umuntu ayanduye hakurikijwe amabwiriza y’igihugu, no kumuhuza ku gihe na serivisi z’ubuvuzi.
2. Gutangira no guhabwa serivise za ART: Gusuzuma umurwayi, gutangira kumuha imiti igabanya ubukana bwa virusi itera SIDA no gusuzuma uko ubuzima bwe bugenda buri gihe.
3. Gutanga imiti: Guha abarwayi imiti ya igabanya ubukana bwa virusi no kubateganyiriza igihe cyo kongera kwisuzumisha kugira ngo ubuvuzi budahagarara.
4. Kugira inama ku gukurikiza amabwiriza yo gufata imiti no gutanga ubufasha mu mibereho n’imitekerereze: Kugira inama abarwayi kugira ngo bafate imiti neza kandi buri gihe, no kubafasha gukemura inzitizi zishobora kubabuza gukomeza kwivuza.
5. Gupima no gukurikirana ubwinshi bwa virusi mu maraso (Viral Load): Gupima ubwinshi bwa virusi mu maraso buri gihe kugira ngo hamenyekane niba imiti ikora neza no gutahura hakiri kare ibimenyetso by’uko ubuvuzi bushobora kuba butagikora neza.
6. Gukurikirana uko umurwayi amerewe mu buzima: Gusuzuma ubuzima bw’umurwayi buri gihe, harimo gutahura no kuvura indwara zifitanye isano na virusi itera SIDA no gukurikirana ingaruka zishobora guterwa n’imiti.
7. Serivisi zo gukumira ubwandu no gufasha ababana na virusi itera SIDA kwirinda kuyanduza abandi: Gutanga inama ku mibonano mpuzabitsina itekanye, gukumira kwanduza abandi virusi itera SIDA no gutanga serivisi zifasha imiryango y’abarwayi.
8. Gupima igituntu n’izindi ndwara zandurira cyane ku bantu bafite ubudahangarwa bwagabanutse: Gupima, gukumira, kohereza abarwayi ku zindi serivisi no kuvura indwara zikunze gufata abantu babana na virusi itera SIDA.
9. Serivisi zijyanye na virusi itera SIDA ku babyeyi n’abana: Kwita ku bagore batwite n’abonsa babana na virusi itera SIDA, harimo gukumira kwanduza umwana virusi itera SIDA , no gukurikirana uko abana bashobora kuba barayanduye bamerewe.
10. Gutanga serivisi zijyanye n'ubuvuzi hakurikijwe ibyifuzo n'ibikenewe by'abarwayi : Abarwayi bujuje ibisabwa bashobora guhabwa uburyo buborohereza bwo guhabwa imiti no gukurikirana uko bivuza, hitabwa n'ibyo bakeneye.
11. Serivisi zo kohereza abarwayi no kubahuza n’izindi serivisi: Kohereza abarwayi mu zindi serivisi zihariye, ibibazo by'imitekerereze cyangwa imibereho yabo bisaba ubundi bufasha bwihariye.
12. Kwigisha no gutanga inama: Kwigisha abarwayi ibijyanye n’ubuvuzi bwa virusi itera SIDA, imirire iboneye, imibereho myiza, uburyo bwo gukumira ubwandu n’akamaro ko kwisuzumisha no gukurikiranwa buri gihe.
